Mos e Ngatërro Punën Tënde me Vlerën Tënde
«Kam mësuar gjithashtu pse njerëzit punojnë kaq fort për të pasur sukses: sepse u kanë zili gjërave që kanë fqinjët e tyre. Por është e kotë. Është si të ndjekësh erën.» — Predikuesit 4:4
Mund të gjejmë shumë justifikime për punën e tepërt. Ndonjëherë ia fajësojmë nevojës për të siguruar familjen. Herë të tjera këmbëngulim se puna jonë është aq e rëndësishme sa që të ngadalësohemi do të ishte neglizhencë.
Por zakonisht, është problem vlerash. Fillojmë të vlerësojmë gjërat e gabuara. Konkretisht, vlerësojmë grumbullimin e gjërave mbi gjithçka tjetër.
Bibla thotë: «Kam mësuar gjithashtu pse njerëzit punojnë kaq fort për të pasur sukses: sepse u kanë zili gjërave që kanë fqinjët e tyre. Por është e kotë. Është si të ndjekësh erën» (Predikuesit 4:4).
Perëndia thotë se kemi dy mundësi: Ose mund të kalojmë gjithë kohën duke u përpjekur t’i mbajmë hapin fqinjëve, ose mund t’i harrojmë ata dhe të ulim nivelin e stresit — por nuk mund t’i kemi të dyja.
Kështu bëhet një çështje vlerash. A dëshiron më shumë gjëra, apo dëshiron më pak stres dhe më shumë kohë me familjen e miqtë? Zgjedhja është jotja.
Jezusi e tha kështu: «Çfarë i vlen njeriut të fitojë gjithë botën, por të humbasë shpirtin e vet?» (Marku 8:36). Ose, «Çfarë të vlen të bëhesh president i kompanisë tënde por të humbasësh fëmijët ose bashkëshortin?»
Përgjigja e thjeshtë? Nuk të vlen aspak.
Puna jote dhe vlera jote janë dy gjëra të ndryshme. Ndoshta je rritur duke të thënë se je i pavlerë, dhe tani je në vendin e punës duke u përpjekur t’u provosh të gjithëve se kanë gabim. Në mendjen tënde, i thua vetes: «Do t’ua tregoj. Do të provoj se kanë gabim.» Punon gjithnjë e më shumë, por sado fort që punon, nuk mjafton kurr. Tamam kur fillon të qetësohesh, dëgjon një zë që të thotë: «Vazhdo të pedalosh. Dikush po të arrin!» Duhet ta heqësh qafe atë zë. Ai po të ushqen me gënjeshtra.
Si pastor, kam qenë pranë shtratit të shumë njerëzve kur kanë vdekur. Kam parë shumë njerëz të marrin frymën e fundit, ndonjëherë në spital, ndonjëherë në shtëpi, dhe ndonjëherë në vendin e një aksidenti. Nga të gjithë njerëzit që kam parë të vdesin në jetën time, nuk kam dëgjuar kurr njeri të thotë me frymën e fundit: «Do të doja të kisha kaluar më shumë kohë në zyrë.»
Asnjë.
A nuk mendon se është koha të rregullosh vlerat e tua? Dil nga gara e kotë.
Ky artikull u botua fillimisht si pjesë e devotshmeve “Daily Hope” nga Dr. Rick Warren. Përkthyer nga anglishtja në shqip. © Rick Warren / Daily Hope. Burimi origjinal: pastorrick.com